《讀者投稿》
我覺得自己老公同老爺奶奶相處左咁多年好犀利。
佢一家債台高築左好多年，主要原因係老爺生意失敗同奶奶炒燶股，而當時佢地啲仔都仲係學生，所以奶奶每個月都要借錢。相信大家都知債冚債有幾高息，同埋會搞到信用度有幾低，於是奶奶開始向佢啲仔女入手，叫佢地幫手借錢，曾經試過叫我老公用信用卡套現，開頭話會還，但其實佢邊有能力，最後當然係個仔還。近來奶奶有個新搞作，想將佢手頭上嗰個單位轉名畀個仔，然後叫佢做按揭，一聽都知係伏。老公利申: 個個月有畀家用奶奶，老爺間唔中會私底下問我老公拎錢，有時都會畀佢。
呢啲事聽左幾年，我而家會覺得嬲嚟都蹝氣，總之唔好叫我畀錢佢就得。唯一一樣我頂唔順嘅係，老爺奶奶仲係好鍾意扮大牌，佢地去到啲相熟餐廳會召廚師出嚟話呢樣唔得嗰樣唔得，又見過佢地偷偷地塞錢入啲侍應袋。
老爺係一個好要面、好鍾意認叻同埋好鍾意管人嘅人，生意失敗之後佢就直接退休，但永遠都當自己仲係老細。我有野唔食老爺會話我唔識食，我話中醫叫我戒口，老爺又會話我睇中醫冇用。雖然我都唔係走溫馴新抱路線，但都冇理由去埋啲受氣地方，所以而家佢屋企啲飯局我9成都唔會出席。但有一次老爺殺左我一個措手不及，佢踩左上我屋企聚會，同我啲親戚講埋啲好失禮嘅野(e.g. 我親戚怕個碟太熱叫佢個仔唔好掂，老爺就話你咁教仔唔得架)。嗰次係老公喺我唔知情嘅情況下叫左佢嚟，冇諗過佢唔喺自己主場都咁唔客氣。
奶奶對外人(包括我)好客氣，鍾意送嘢畀人，但佢係會送啲佢幾十年前嘅舊衫/着過嘅鞋畀我。奶奶金句:「你瘦你着得好睇呀!」我通常都會話「唔係呀好似襯你多啲喎~」咁樣推佢。最經典一次係佢硬塞左一套衫落我個袋，迫於無奈都要拎返屋企，點知過兩日佢whatsapp我老公:「套衫係唔係唔啱? 唔啱就畀返我，唔好浪費。」我就同老公講，咁你叫奶奶以後都唔好咁浪費喇 不過除左有少少怪，奶奶都算幾好應付，不過從老公口中得知，奶奶成日都因為錢嘅問題情緒勒索佢屋企幾個男人，係會喊生喊死嗰種，聽到都鄧佢地辛苦。
知道佢一家有錢銀問題，所以準備結婚嗰陣我從來都冇諗過要老爺奶奶出錢，而奶奶都喺我老公求婚冇幾耐，就主動同個仔講佢地唔會幫到我地，叫我地自己儲錢結。所以我同老公都冇請示過老爺奶奶禮金要點，我地兩個決定畀幾多我爸爸媽媽就OK。我問我爸爸媽媽XXXXX呢個數字嘅禮金得唔得，佢地竟然話唔駛，叫我地留返啲錢。咁當然我同老公有另外送啲貴重禮物畀佢地，但都要多謝我爸爸媽媽當我老公好似自己個仔咁錫<3 至於奶奶呢，代佢班親戚問我地想要咩禮物，我地話要金。過兩日又問個仔，而家啲金咁貴，不如叫親戚畀錢算，我心諗咁你又問我 但都覆左奶奶其實冇所謂。再過兩日，奶奶又話既然你地想要金，佢自己送一對鈪畀我，講到我地好介意咁。其實買鈪咪又係我老公畀錢，不過為左奶奶唔好再煩我地就由得佢。
同老爺奶奶相處左幾年，小小心得:
1. 首先唔好擺喺心，又唔係同佢地過人世，有時想發滯就同姊妹當係八卦咁講下
2. 不時順下佢意，唔駛用你太大額嘅錢，又可以令佢唔再煩你嘅，由得佢
3. 踩到你底線時要適時反擊，等佢知道你唔好恰
4. 唔好一味喺老公面前話老爺奶奶，話哂都係佢自己父母，要循循善誘佢發現你對佢爸媽有咩不滿，同埋你想做到咩(e.g. 豁免佢地啲屋企飯局)。你對老公好、好相處，佢自然會痴你多啲，我就再好彩啲，因為我嗰邊啲親戚長輩全部都對我老公好好，有佢地助攻係事半功倍。
＃我的極品四大長老
Search